banner11.jpg

Berriak

Eusko Labela duen Euskal olioaren ezaugarriak hedatzeko jardunaldia

Gaur goizean, Hernaniko Chillida Leku Museoan, gastronomia munduko profesional eta preskriptoreei zuzendutako aurkezpen-jardunaldia egin da, Eusko Labela duen Oliba Olio Birjina Estraren erabileraren eta kontsumoaren abantailak ezagutarazteko. Bere ezaugarri eta dohainen berri emateaz gain, Euskadiko olioaren ekoizpen-sektoreari buruzko datuak eta jarduera horrek bizi duen egoerari buruzkoak eman dira ezagutzera aurkezpenean, gaur egun 57 profesional baitaude bertan erregistratuta.

 

Eusko Labela duen Oliba Olio Birjina Estra ekoizpen mugatuko elikagaia da, Arroniz barietatearekin egina, eta kalitate-ezaugarri batzuk ditu, olio berezi bihurtzen dutenak, baina oraindik ere ezezaguna da euskal kontsumitzaileentzat. Hori dela eta, HAZIk eta Arabako Errioxako Olibondoa eta Olioa Sustatzeko Elkarteak (APRORA) antolatutako jardunaldi honen helburua euskal gastronomiarekin lotutako adituek produktu horiek sustatzea da, eta olio-dastaketa egitea eskaini zaie, Euskal Ogia eta Euskal Gatzarekin.

Euskadin 160 hektarea baino gehiago daude erregistratuta gaur egun olibondoaren laborantzarako, 75 hektareako olio-azalerarekin, eta horietatik 20.000 litro olio ekoizten dituzten ia 100.000 kilo oliba ateratzen dira kanpainan zehar.

HAZIk, Basque Culinary Centerrek eta euskal gastronomiaren agente nagusiek “Mantala Basque Gastronomy” aurkeztu dute

Mantala Basque Gastronomy ekimenaren xedea da euskal gastronomia sustatu eta garatzea, ezagutzaren trukea eta elkarrekiko sormena sustatuz. Basque Culinary Centerrek eta Hazi Fundazioak bultzatuta, Eusko Jaurlaritzako Ekonomiaren Garapen, Jasangarritasun eta Ingurumen Sailak sustatutako Euskadiko Gastronomia eta Elikaduraren Plan Estrategikoaren (PEGA) esparruan, Mantala edukien plataformak eragile publiko eta pribatuen sare batekin lankidetzan eraiki da: Gastronomiaren Euskal Akademia, Fecoga, eta Jakitea, besteak beste. Gaur inoiz baino gehiago funtsezkoa da euskal gastronomiaren kokapena indartzen jarraitzea mundu-mailan.

Mantala espazio gisa planteatzen da, non ezagutza, ikerketa eta lankidetza gastronomikoan oinarritutako hainbat edukik eta proiektuk bat egiten duten. Ekimenak euskal gastronomiaren identitatearen balio nagusien garapena eta entzutea sustatzen du, modu dinamikoan eta etorkizunerako ikuspegiarekin, kalitatezko eduki digitalak hedatu eta agerian jarriz webgune batean (www.mantala.eus - profil sozialekin lotuta), baita hainbat ekitaldirekin ere. Gainera, Mantala hainbat proiektu zentraletan oinarrituko da, komunikazio-ardatz nagusia indartuko dutenak.

Pertsonak, egiten jakiteari, ezagutzari eta euskal gastronomiarekin lotutako bizipen pertsonalei dedikatutako espazioa, figura eta istorio inspiratzaile eta funtsezkoen bidez; Mapa gastronomikoa, Euskadi osoko tokiko prestaketa eta produktuen erregistro eta katalogaziora bideratutako proiektua, zeinaren helburua den eduki berriak sortzea eta ezagutzaren transmisioa bermatzea; Euskal Gastronomiaren topaketa, sektorearen indartzea izango du xede nagusi hausnarketaren eta etorkizuneko gakoak hautematearen bidez, eta, horretarako, euskal sektore gastronomikoa osatzen duten profesionalen arteko elkarrizketa sustatuko du; eta Gastro Gaztea, euskal gastronomiako talentu handiko gazteak bilduko dituzten afariak izango dira.

Mantalako aktore arduradunek Gastro Gaztearen lehen afaria aprobetxatu dute proiektua elkarrekin aurkezteko. Aurkezpenean izan dira Bittor Oroz, Nekazaritza, Arrantza eta Elikadura Politikako sailburuordea, Peli Manterola, HAZIko zuzendari nagusia eta Joxe Mari Aizega, Basque Culinary Centerreko zuzendaria. Gainera, ekimenean parte hartu duten gainerako eragileen ordezkariak ere izan dira: Rafa Gorrotxategi, Jakitea-ko lehendakariordea, M. Mar Churruca, Euskal Gastronomia Akademiako presidentea, eta Juan Manuel Garmendia, FECOGAko presidentea. Tabakalerako LABe Restaurant-en eskaini den Gastro Gaztea-afariak, esparru ezin hobea ekarri du Mantala aurkezteko.

Ekintza gastronomiko ezberdinak

 

Euskal gastronomiaren barruan mugimendu gazte eta dinamiko bat dago, ekintzailetzan, laguntasunean, jasangarritasunean eta tokiko produktuaren balioan oinarritzen dena. Testuinguru horretan, hainbat ekintza gastronomiko jarri dira abian, funtsezko zutabe horiei balioa emateko, eta plater ezberdinen bidez, sasoiko produktua eta sukaldaritzako teknika tradizionalen garrantzia lantzeko. 6 eskutara burutu den lehen afarian, eskualde bakoitzeko jatetxe banako sukaldariek hartu dute parte: Garena Jatetxea (Bizkaia), Kromatikoa Jatetxea (Araba) eta Ama Taberna (Gipuzkoa).

Afarian erabilitako edariak, txakolina, sagardoa eta ardoa, Basque Wine-ek eskaini ditu - promozio marka horrek kalitatezko kalitatezko marka eta jatorri ezaguna duten Euskadiko edariak onartzen ditu.

Informazio gehiagorako: www.mantala.eus

HAZIren laguntzarekin 23 euskal enpresak parte hartuko dute Gourmets Azokan

Eusko Jaurlaritzako Ekonomiaren Garapen, Jasangarritasun eta Ingurumen Sailak, HAZIrekin lankidetzan, 23 euskal enpresa ekoizlek taldean Gourmets azokako 34. edizioan parte hartzea sustatu du. Ekitaldi hori kalitatezko elikagaien eta edarien Europako nazioarteko azoka handiena da, eta Madrilen egiten ari dira bihar arte. Gourmets azoka lehenengoz egin da, iazkoa bertan behera geratu odnoren, pandemia tarteko. Hori dela eta, positiboki baloratu da edizio honetan Euskadi Basque Country markaren babesean parte hartu nahi izan duten euskal enpresen kopurua. Eusko Jaurlaritzaren xedea da Euskadiko elikagaien eta edarien industria nazioartekotzea, joeren erakusleihoak baliatuta, hala nola Gourmets azoka.

Erakundeek sektorea babestearen erakusgarri, gaur goizean, Eusko Jaurlaritzako Nekazaritza, Arrantza eta Elikagaien Politikako sailburuorde Bittor Oroz eta HAZIko zuzendari Peli Manterola Madrilen izan dira, azokan parte hartzen ari diren enpresak bisitatzeko.

Edizio honetan, enpresa hauek ari dira parte hartzen Euskadi Basque Country markaren standean:

  • Sal de Añana
  • Ameztoi
  • Bacalaos Alkorta
  • Casa Eceiza
  • Agour Berri
  • Txakoli Agerre
  • Conservas Serrats
  • Hamburguesas Eizaguirre
  • Gelati !! Gelati !!
  • Casa Brigitte SL
  • Bacalaos Ederpesca
  • Conservas Olasagasti
  • Luis Thate
  • Patatas Sarriegui
  • Conservas Campos
  • Rafa Gorrotxategi 1680 SL
  • Zubia
  • Artomaña
  • Bello Berganzo
  • Bodega Berroja
  • Blai & Blai
  • Gil Berzal
  • Hermanos Frías Del Val

Gourmets azokari buruz

Gourmets azoka munduko erreferente ospetsuenetako bat da elikagaien eta edarien industriarako. Nazioarteko profesionalen topagune nagusia da. Bertan, produktu tradizional bikainak zein joera berriak aurki daitezke, eta gastronomiako profesionalentzat da soilik: jatetxeak, ostalaritza, banaketa, cateringa eta saltoki espezializatuak. 2021eko azokan, 70.000 bisitari profesional izatea espero da, baita 1.500 enpresa gastronomiko ere, 37.000 produktu eta 1.300 berritasunekin.

Euskadiko elikagaiak eta edariak sustatzen diardugu

Gourmets azoka izan da Eusko Jaurlaritzako Ekonomiaren Garapen, Jasangarritasun eta Ingurumen Sailaren eskutik euskal elikadura-enpresek udazken honetan parte hartu duten azken azoka.

Guztira, 44 euskal enpresak parte hartu dute Euskadi Basque Country markapean azoka horietakoren batean. Dagoeneko baieztatu da euskal elikadura-industria sektorerako hainbat hitzordu komertzial garrantzitsutan izango dela 2022an: Wine París & Vinexpo, Fenavin, ProWine Asia Singapur, ProWein eta Alimentaria. Gainera, Euskadiko Elikagaien Industriaren 2022ko Sustapen Planak programatutako ekintza guztiak jasotzen ditu, euskal enpresei nazioartekotzen laguntzeko, haien produktuak sustatzeko eta merkatu berrietan duten presentzia areagotzeko.

Estamentu publikoetan emakumeen parte-hartzea areagotzeari buruzko aldarrikapena izan da Landa Eremuko Emakumeen Nazioarteko Egunaren ardatza

Eusko Jaurlaritzak aurten ere ospatu du Landa Eremuko Emakumeen Nazioarteko Eguna. Horren harira, jardunaldi bat antolatu du goizerako, “Landa-eremuko emakumeen parte-hartze publikoa” lelopean. Horren baitan emakumeek bizitza publikoa eta soziala osatzen dituzten estamentu eta erabaki-organoetan jokatzen duten rola aztertu eta aldarrikatu nahi izan da. Landaren eta Itsasertzaren Garapeneko eta Europar Politiketako zuzendari Jone Fernándezek aurkeztu du topaketa, eta amaierako mahai-inguruan bitartekari-lanak ere egin ditu.

Bere hitzetan, hauxe da egunaren helburua: “Landa-eremuko garapen sozioekonomikoan, elikagaien segurtasunean eta pobrezia errotik ezabatzeko zereginean emakumeek duten funtsezko rola aitortzeko lanetan aurrera egitea. Ekonomiaren Garapen, Jasangarritasun eta Ingurumen Sailak, HAZIrekin batera, ia hogei urte daramatza ekitaldi hori antolatzen, landa-eremuko emakumeek egiten duten lanaren balioa azpimarratzeko xedez, eta landa-inguruneko emakumeen eta gizonen arteko berdintasunaren sustapenean aurrera eginez”.

Hitzaldiak

Jardunaldian, izen handiko hiru emakume adituren hitzaldiak izan ditugu. Lehendabizi, Errotik Kooperatiba Feministako kide Esther Escuderok parte hartu du, eta “Emakumeen parte-hartzea esfera publikoan” gaia landu du. Hitzaldiaren bidez, esfera publikoen egungo egoeraren irudi orokor bat osatu du, datu estatistiko eta txosten garrantzitsuenen analisiaren bidez, eta bereziki azpimarratu ditu parte-hartze orekatua, egiazkoa eta eraginkorra izateko dauden zailtasun nagusiak. Ondoren, Leire Milikuak hartu du hitza, eta “Landa-eremuko emakumeak, emakume nekazariak: garrantzia eta parte-hartzea” gaia jarri du mahaiaren gainean. Haren hitzaldian, landa-ingurunearen eta eremu geografiko bakoitzaren testuinguru soziokulturalaren berezitasunak aztertu ditu, eta Euskadiko landa-ingurunearen egungo egoerari buruzko azalpenak ere partekatu ditu. Leire Milikua Emakume Nekazarien Estatutuaren idazkari teknikoarekin lankidetzan aritu da, eta, gaur egun, Emakunderen beka baten bidez ari da Euskadin emakumeek nekazaritzaren sektorean duten parte-hartzeari buruzko azterlan bat egiten. Azken hitzaldia Pilar Legarrak egin du, eta “Emakumeak toki-erakundeetan” gaia izan du ardatz. Pilarrek nabarmendu du Euskadiko alkateen herena baino gutxiago besterik ez direla emakumeak, eta soilik hamar udalerri handienetako lautan jarduten dutela.

 

Halaber, adierazi du ez dagoela zinegotzigoei buruzko daturik. Bere ustez, denboraren antolaketa landu behar da, horrek politikan inplikatzen diren pertsona guztiei —gizonak eta emakumeak— ekarriko baitie onura; hala ere, emakumeek nagusiki desabantaila dutela ikusita, emakume politikariei onura handiagoa ekarriko die, eta, horrela, eragin-eremua parekatuko da. Jardunaldiari amaiera emateko, mahai-inguru bat antolatu da. Bertan, hiru hizlariek beren testigantzak eta esperientziak partekatu dituzte landa-eremutik alor publikoan parte hartzeko arazoak zuzenean ezagutzen dituzten bi emakumerekin: Nieves Quintana (ACOVI Gasteizko Kontzeju Elkarteko presidentea) eta Itsaso Agirre (ELE - Gipuzkoako Latxadunen Elkarteko eta GILE - Gipuzkoako Limousin Arrazako Ganadu Hazleen Elkarteko kidea).

Emakume Nekazarien Estatutua

Gaur, 2021eko urriaren 15ean, 6 urte bete dira Eusko Legebiltzarrean Emakume Nekazarien Estatutua aho batez onetsi zenetik. Estatutu horrek emakume nekazarien eskubideak hartzen ditu abiapuntu, eta administrazio publikoen betebeharrak zehazten ditu, eskubide horien erabilera eraginkorra bermatzeari begira. Hortaz, nekazaritzaren sektorean emakumeen eta gizonen arteko tratu- eta aukera-berdintasuna erdiesteko eta sektorearen alor guztietan genero-ikuspegia txertatzeko beharrezko neurriak jasotzen dituen legea da. Ezinbestekoa da emakumeek alor publikoan parte hartzeko pairatzen dituzten desberdinkeriak gainditzea nekazaritzaren sektorean emakumeen eta gizonen arteko benetako berdintasun eraginkorra lortu nahi bada; eta, horretarako, gako-gaietako bat dira ustiategietako baterako titulartasunak, horrek dakartzan eskubideekin, emakumeek ustiategietan egiten duten lana ikusarazteko.

Nekazaritzako, Arrantzako eta Elikagai Politikako Sailburuordetzak,HAZIren lankidetzarekin, titulartasun partekatuari buruzko ikerketa bat bultzatu du. Ikerketa hori Nekazaritzako, Arrantzako eta Elikagai Politikako Sailburuordetzak 2021eko martxoaren 30ean Emakume Nekazarien Estatutuaren Jarraipen Batzordeko Osoko Bilkurari iragarritako jarduketa-planaren parte da.

Somerset-eko (Erresuma Batua) Hauser & Wirth arte-zentroak Euskadiko eskaintza gastronomiko eta enologiko zabala eskaintzen die bisitariei

 

“Hauser & Wirth Somerset” galeriak Eduardo Chillida euskal artistaren hainbat lan jasoko ditu 2022ko urtarrila bitartean, Somerseteko (Erresuma Batua) Durslade Farm-eko instalazioetan. Erakusketak topaketa berriak proposatuko ditu Chillidaren obraren eta Hauser & Wirth Somerset-en ingurune paregabearen artean, eta  paralelismo bat ezarriko du artistaren ikuspegiarekin Chillida Lekurentzat

Ekimen honen esparruan, Basque Wine Euskadiko edarien sustapen-marka ekitaldiaren babesle gastronomikoa da, eta euskal eskaintza gastronomiko eta enologikoa jartzen du haren eskura, Eduardo Chillida artista unibertsala sortu zen euskal kultura ulertzen laguntzeko.

Eusko Jaurlaritza eta HAZIren eta Chillida Lekuren arteko lankidetza hitzarmen helburu nagusia Basque Wine promozio markapean babestutako edariak ezagutzera eramatea da. oposamena "Basque Fest" baten bidez gauzatzen ari da, eta, horretarako, Durslade Farm enpresaren instalazioetan urriaren 8tik 11ra eta 22tik 23ra bitartean egingo diren ekitaldiak baliatu dira. Urriaren 22-23ko asteburuan, euskal kultura-ekitaldien programa bat egingo dute Eusko Jaurlaritzako Kultura Sailaren eskutik, Kukai eta Oreka TX taldeekin, eta horri esker, bisitariak Euskadiko kultura gastronomikoan murgilduko dira. Lan-proposamenari esker, Basque Fest-ek irauten duen sei egunetan bisitariek euskal gastronomian oinarritutako menua izango dute. Menu horri euskal gastronomiak eskaintzen dituen aukeren adierazgarri izango da, eta Euskadin ekoizten diren eta Basque Wine markak babesten dituen edarien eskaintza osoa izango du. Zehazki, honako edari hauek izango dira: Arabako, Bizkaiko eta Getariako Txakolina, Euskal Sagardo Naturala eta Arabako Errioxako ardoa.

Urriaren 8an, 50 mahaikiderentzako gala-afaria eskaini zen eta menua euskal jakin tradizionalek osatu zuten. Gainera, plater bakoitza Basque Wine edari batekin uztartu zen.Urriaren 9an, berriz, festa bat antolatu zuten aire zabalean. 300 lagun bildu ziren eta euskal jaki tradizionalen "zutik jateko" menua izan zuten. Menua bisitarien eskura zeuden "pintxoz" beteriko erakustokietan aurkeztu zen, bisitari bakoitzak gutxienez horietako batzuk dastatzeko aukera izan zezan. Menuaren zati bat jendearen aurrean prestatu zen, parriletan, Euskadiko teknika tradizionalen bidez; horrez gain, bananduta zeuden erakustokietan, edarien eskaintza zabala zuten Basque Wine Bar izeneko barrak instalatu ziren. Urriaren 10ean, museoaren patronatuak Euskadiko kalitateko produktuekin egindako otordua dastatu ahal izan zuen, bai eta Arabako Errioxako ardoa, Txakolina eta Euskal Sagardoa ere. Azkenik, gaur 120 lagunek gozatuko ahalko dute Basque Brunch batez, eta Basque Wine edarien 3 dastaketa komentatutan hartu ahalko dute parte, Mikel Garaizabal enologoaren eskutik.

Urriaren 22an eta 23an ere, Euskadiko gastronomia eta enologia bertan izango dira; izan ere, ostiralean, festa bat egingo dute aire zabalean 100 lagunentzat eta, larunbatean, Basque Grill Córner bat. Azken ekintza hori izango da jendetsuena, 1350 lagun bertaratuko baitira.

 Basque Wine

Basque Wine Euskadiko edarien eta upategien sektorea bultzatzeko sustapen‑marka berri bat da, eta honako edari hauek babesten ditu: Errioxa JDBa duen ardoa (Euskal Autonomia Erkidegoan botilatua eta Eskualdeko Ardoa, Udalerriko Ardoa edo Arabako Errioxako Mahasti Berezia etiketa duena); “Basque Beer” artisau-garagardoen marka kolektiboko garagardoak; “Txakoli de Álava-Arabako Txakolina”, “Bizkaiko Txakolina-Txakoli de Bizkaia”, “Txakoli de Getaria-Getariako Txakolina” JDek babesten dituzten txakolinak; eta, “Euskal Sagardoa- Sidra Natural del País Vasco” jatorri-deitura duten sagardoak.

Ekintza hori Euskadiko edarien sektorea babesteko, sustapen- eta kontsumo‑kanalak indartzeko eta euskal upategietako produktuen kokapena indartzeko lankidetza publiko-pribatuko estrategia baten barruan sartzen da.

 

Gure arrainaz maitemintzeko kanpaina

Eusko Jaurlaritzak, HAZI-ren bidez, Euskadin arrainaren kontsumoa sustatzeko kanpaina jarri du abian, horrek osasunerako dituen onurak jakinaraziz eta gure arrandegietan erostera animatuz eta, horrela, bertako ekonomiaren garapena bultzatuz.

Kanpaina urrian ikusi ahal izango da, eta modu dibertigarri, desberdin eta dotorean erakusten du gure arrainek kontsumitzaileekin duten maitasun-harremana. Erlazio hori arrandegietan hasten da, maitasun-ziztada sortzen den lekuan.

Gure arraina hain da erakargarria zaporeagatik, kalitateagatik eta osasunerako onurengatik, non ondo ezagutzen duen edonor maiteminduko baita. Jatekoak daude!

 

Proba itzazu errezeta erraz hauek eta maitemindu zaitez:

Arrandegia bazara eta arrain-kontsumoa sustatu nahi baduzu, deskargatu kartelak eta jarri zure dendan:

ANAREN KARTELA

KOLDOREN KARTELA

Euskadiko arraindegietako ohiko arrainak

Añanako “Labean espazioa” aurkeztu da, landa-eremuan berrikuntza sozialeko eta ekintzailetasuneko ekintzak garetzeko gunea

Gaur goizean inauguratu da Arabako Kuartango udalerrian Añanako Labean Espazioa, eta espero da erreferentziazko gune bihurtuko dela landa-eremuan ekintzailetzako eta berrikuntza sozialeko ekintzak garatzeko. Espazio horrek herritar guztien eskura jarriko ditu teknologia eta lan-metodologia berritzaileak, eskualdea eraldatu eta tokiko komunitatean aurrerapenak egiteko.

Espazio hau beste mugarri bat da 2019an Euskadiko landa-eremuaren garapena sustatzeko Labean programarekin hasi genuen ibilbidean. Ordutik hona, eskualdeko premiei modu berritzailean eta elkarlanean erantzuteko soluzioak definitzea ahalbidetu duten zenbait analisi egin dira. Gaur aurkezten dugun zentro hau soluzio horietako bat da”, adierazi du Eusko Jaurlaritzaren Nekazaritza, Arrantza eta Elikagaien Politikako sailburuorde Bittor Orozek.

Labean Espazioaren instalazioetan tresna telematikoak daude komunitatea osatzen duten eragile, erakunde, enpresa, eta abarren arteko konexioa eta sareko elkarlana errazteko. Helburua da bermatzea IKTak edo teknologia berriak erabiltzeak pertsonen bizi-kalitatea hobetu eta herritarren parte-hartzea areagotzen duela. Edonola ere, ez da espazio isolatu bat: Añanako gunea Euskadiko landa-eremuko espazioen sarearen barruan dago. Sare horrek, Labean programaren babespean, aukera emango du ekintzaileen, tokiko erakundeen, elkarteen, eta abarren artean berrikuntza sozialeko ekimen eta proposamenak harremanetan jarri eta konektatzeko. Bada, aurkezpenean bertan, zuzenean konektatu da, telematikoki, Arabako Mendialdeko eta Enkarterriko Labean sareko espazioetako ordezkariekin.

Labean Espazioa

Abangoardiako lan-zentro hau Kuartangoko bainuetxe ohiaren eraikinean dago (Kuartago Lab). Une honetan, enpresa-zentro bat sortu da espazio horretan. Bertan, bi ekimen daude jada martxan, eta ekintzaile gehiago hartzeko prestatzen ari da gunea. Enpresen zentro horretan, coworking espazio bat diseinatu da, baita espazio hori erabiltzeko funtzionamendu-protokolo bat prestatu ere. Kuartangoko Udalak eta Labean Espazioan lan egin nahi duten pertsonek onartu beharko dituzten baldintzak zehazten dira bertan.

Eskualde honetako Labean programako talde dinamizatzailea HAZIk, Kuartangoko Udalak eta Añana LGEk osatzen dute gaur-gaurkoz. Nekazaritza, Arrantza eta Elikagaien Politikako Sailburuordetza da ekimen honen sustatzaile nagusia, eta haren helburua da Euskadiko landa-eremuetan garapen sozioekonomikoa bultzatzea, horretarako digitalizazioari eta digitalizatzeak lurraldeari ematen dizkion aukerei garrantzi handia ematen dien berrikuntza sozialeko programa bat baliatuta.

"Berrikuntza Sozialaren Asteazkenak" egitasmoak lanerako bide berri hori ezagutaraziko du landa-lurraldeen eraldaketa sustatzeko tresna gisa

LABEAN proiektua duela hiru urte sortu zen berrikuntza sozialaren kultura zabaltzeko Euskadiko landa-eremuetan. Orain, ekintza berri bat jarriko du abian: "Berrikuntza Sozialaren Asteazkenak".

Hiru online saioren bitartez, ekimen horretako partaideek berrikuntza sozialerako oinarriak eta gure landa-eremuak garatzeko ematen dituen aukerak ezagutu ahalko dituzte, beste egiteko modu batzuei buruz sentsibilizatu ahalko dira eta toki-erakundeek beren lurraldeen eraldaketari laguntzeko eta sustatzeko duten funtsezko zereginaren berri izan ahalko dute.

Atzo egin zen lehenengo saioa: “La innovación social como oportunidad para las zonas rurales” (Berrikuntza soziala landa-eremuetarako aukera gisa). Eusko Jaurlaritzako Landaren eta Itsasertzaren Garapena eta Europar Politikako zuzendari Jone Fernándezek inauguratu du jardunaldia, eta Eusko Jaurlaritzak berrikuntza sozialaren ikuspegiarekin lan egin nahi duela nabarmendu du, landa-lurraldeen garapena ahalbidetuko duen beste tresna bat delako.

"Landa-inguruneak, berezko ezaugarri espezifikoak eta erronka propioak izanik, lan egiteko tresna eta modu berriak behar ditu. Berrikuntza soziala izango da eskualdeen lanerako bide berria, gizarte-arazo zaharrei soluzio berriak bilatzeko"– baieztatu zuen Jone Fernandezek.

"Berrikuntza Sozialaren Asteazkenak" egitasmoa Eusko Jaurlaritzako Nekazaritza, Arrantza eta Elikagaien Politikako Sailburuordetzak antolatu du, HAZIren bitartez, eta Euskadiko landa-inguruneko toki-erakundeen ordezkarientzat da (udalak, administrazio-batzarrak...), baita landa garapenerako elkarteentzat ere; izan ere, toki-erakundeek zeregin oso garrantzitsua dute lurraldearen dinamizatzaile eta eragile lotzaile gisa. Ondorioz, saiootan tresnak jasoko dituzte gazteen partaidetza eta konpromisoa lortzeko eta landa-eremuetan bizitzeko eta lan egiteko espazio erakargarriak sortzeko.

Proiektu berriak inspiratzeko saioak

"Berrikuntza Sozialaren Asteazkenak" egitasmoan hiru saio egingo dira online. Lehen saioa atzo arratsaldean egin zen, eta landa-eremuetarako berrikuntza sozialaren aukeren ingurukoa izan zen. Urriaren 27koa berrikuntza sozial gazte eta landa ingurukoari buruz izango da, eta azaroaren 24koa, berriz, gizarte-ekintzailetzari eta landako toki-erakundeei buruz.

Saioei esker, Euskadiko nahiz lurraldetik kanpoko landa-udalerrietan egindako esperientzien berri izango da. Esperientzia inspiratzaileak eta errepikatu daitezkeenak izango dira, edo udalerri edo administrazio-batzar bakoitzaren errealitatera, beharretara eta aukeretara egokitutako proiektu berrien abiapuntu izan daitezkeenak, besteak beste. Saio bakoitzean esparru-hitzaldi bat eskainiko da landuko den gaiari buruz, eta, ondoren, esperientziak aurkeztuko dira eta galderak egiteko eta eztabaidarako txanda irekiko da parte-hartzaileen artean.

LABEAN proiektuaren baitan antolatutako ekintzetan parte hartu dutenek identifikatutako kezkei erantzuten die saio bakoitzeko gaiak, LABEAN proiektua 2019an abian jarri zenetik bildu baitira kezka horiek egitasmoa garatu den hiru eskualdeetan: Arabako Mendialdean eta Añanan, Araban, eta Enkarterrin, Bizkaian. 

Atzoko jardunaldian, "Berrikuntza Sozialaren Asteazkenak" ekimena aurkeztu ondoren, berrikuntza sozialaren kontzeptua azaldu zuen Innobasquek, eta landa udalerri berritzaileek abian jarritako hiru esperientziaren berri eman zen: “Zahartze aktiboa”, Zanbranan (Araba); “Errebote plaza”, Seguran (Gipuzkoa); eta “Activa Valverde”, Valverde de Burguillosen (Badajoz).

Elikaduraren euskal industria Lyoneko SIRHA azokan izan da

COVID-19aren eraginez nekazaritzako elikagaien arloko nazioarteko azokarik egin gabe urte eta erdi igaro ostean, udazken honetan berriro ekin zaio sektorerako hitzordu garrantzitsuenak antolatzeari. Azoketako lehena SIRHA 2021 izan da, ostalaritza, catering, sukaldaritza eta elikaduraren arloko nazioarteko erakustazoka.

Lyonen egin da irailaren 23tik 27ra, eta bertan izan dira bost euskal enpresa, talde gisa, Eusko Jaurlaritzak HAZIren bitartez antolatutako Euskadi Basque Country standean.

Parte-hartzea aurreko edizio batzuetakoa baino txikiagoa izan arren, Eusko Jaurlaritzak azoka horretara joatearen alde egin du nekazaritzako elikagaien euskal industriak presentzia izan dezan, berriro ere, nazioarteko azoketan. Hasieran, nahiz eta enpresek ziurgabetasuna izan pandemiaren osteko nazioarteko aurrez aurreko lehenengo hitzordua zelako, bertaratutako enpresek oso ondo baloratu dute.

Azokak iraun dituen bost egunetan hainbat profesionalen bisitak jaso dira, eta harremanak ezarri dira enpresa horien produktuekiko interesa erakutsi duten HO.RE.CA kanaleko inportatzaile eta banatzaileekin. Ekitaldi hori bi urtean behin egiten da, eta elikaduraren sektoreko erakundeen ordezkariak bertaratu eta aktiboki parte hartzen dute, batik bat Frantziako sektorekoak, joera eta produktu berriak, merkatuaren bilakaera eta hornitzaile berriak ezagutzeko asmoz.

Euskadi Basque Country standean, eskatutako osasun-neurri guztiak beteta, euskal enpresa parte-hartzaileen produktuak ezagutu eta dastatu ahal izan dira, hain zuzen Salanort, Conservas Ortiz, La cocina de Senen, Sarriegui eta Rafa Gorrotxategi enpresenak.

SIRHA Lyoni buruz

SIRHA erreferentea da ostalaritzaren munduan, eta hainbat sektoretako profesionalentzat da, hala nola sektore hauetakoentzat: nekazaritzako elikagaiak eta edariak; gozogintza eta okintza; gozoak; ostalaritzako materialak eta ekipamenduak; teknologiak eta zerbitzuak, etab. 2021eko edizioan, azokak 2.000 erakusmahai inguru izan ditu.

Frantzia, ondoko herrialdea izanik eta dituen azpiegiturak kontuan hartuta, estrategikoki kokatuta dago euskal nekazaritzako elikagaiak esportatzeko, eta, gainera, Europako gainerako herrialdeetan sartzeko atea izan daiteke. Gutxi gorabehera 60 milioi biztanleko merkatua denez, gourmet merkatu nagusietako bat da. Frantziako kontserbako eta bertan prestatutako elikagaien kontsumoa haren ekoizpen nazionalaren gainetik dago; hori dela eta, produktu mota horren inportazioak etengabe hazten dira. Arrain-kontserbek kokapen ona dute. Plater prestatuen sektorea, kalitate eta prezioagatik, merkatuaren gourmet nitxoan dago. Gozogintza eta gozoen eskaera handia dago Frantzian, eta garrantzi berezia ematen diete zenbait produkturen (kakaoa edo txokolateak, esate baterako) jatorriari.

Euskadiko nekazaritzako elikagaiak sustatzeko udazkena

SIRHA azokan izan ondoren, Eusko Jaurlaritzako Ekonomiaren Garapen, Jasangarritasun eta Ingurumen Sailak nekazaritzako elikagaien euskal industria kanpoan sustatzen laguntzen jarraituko du, urrian egingo diren nazioarteko azoketan: CONXEMAR 2021, Vigon egingo da urriaren 5etik 7ra; ANUGA 2021, Kolonian (Alemania) egingo da urriaren 9tik 13ra; eta GOURMETS 2021, Madrilen egingo da urriaren 18tik 21era.

Bestalde, Euskadiko Elikagaien Industriaren 2022ko Sustapen Plana argitaratu da jada. Egitasmo horretan jasotzen da taldean bertaratzeko asmoa elikagaien eta edarien estatuko eta nazioarteko hamar azoketara baino gehiagotara.

Elikagaien sektorean teknologiaren, bizkortasunaren eta lankidetzaren arteko oreka lortzea: funtsezkoa da merkatuko eskari berriei aurre egiteko

Eusko Jaurlaritzak eta HAZIk antolatu eta gaur Donostian egin den “Elikaduraren balio katea 4.0 - Gaurko irtenbideak eta biharko beharrak” EHUren uda ikastaroan hainbat esperientzia ezagutu ahal izan dira: nekazaritzako elikagaien industria txikiei eta nekazaritza-ustiategiei aplikatutako sentsorika, abereen geoposizionamendua eta hesi birtuala, produktu eraldatuak egiteko 4.0 soluzioak, intsumoen optimizazioa, nekazaritzako eta basogintzako teledetekzioa eta monitorizazioa, haragiaren eta arrantzaren eraldaketa-kateko blockchain eta mahastizaintzaren sektoreko Big Data aukerak.

 “Gure produktuen lehiakortasunean aurrera egiteko funtsezkoa da Euskadiko elikaduraren balio kate osoaren integraziorako ekintzailetza teknologikoa sustatzea eta sektore arteko lankidetzako dinamika adimendunak diseinatzea”. Hala adierazi du Eusko Jaurlaritzako Nekazaritza, Arrantza eta Elikagaien Politikako sailburuordeak, Bittor Orozek ikastaroaren aurkezpenean. Orozek erantsi du “kate-begiek elkarri abangoardiako estrategien berri emanez gero, kate osoa hobeto kokatuko da merkatuan, irtenbideak aurkitzeko batuko da eta erronka berriei aurrea hartuko die. Ekoizpena, industria eta banaketa lankidetzan aritu behar dira”.

COVIDaren aurkako neurrien ondorioz edukiera mugatua izan den arren, trebakuntza-ekintza honetako partaideek hainbat irtenbideren berri izan dute datuen digitalizazio adimenduna lortzeko eta tresna teknologiko berriak prozesu osoan sartzeko, hasi landatik eta produktuak kontsumitzera arte. Teknologia honen, ekoizpen-prozesuen bizkortasunaren eta sektoreko eragileen lankidetzaren arteko oreka lortzea funtsezkoa da, merkatuko eskariei eta elikagaien kalitate eta segurtasun arloko betebeharrei aurre egiteko. Eraldaketa digitalak nekazaritzako elikagaien sektoreari eskaintzen dizkion abantailen berri eman da, aberastasuna eta enplegua sortzeko sektore estrategikoa baita. Horrexegatik egin behar dio aurre Nekazaritza Politika Erkidearen (NPE) modernizatzeko zeharkako helburuari. Euskadiko Digitalizaziorako Esparru Estrategikoan jasota dago helburu hori.

Ikastaroan zenbait teknologia aztertu dira, hala nola IoT (Internet of Things), adimen artifiziala, big data edo blockchain-a; guztiak ere prozesuen eraginkortasuna eta baliabideen erabilera errazteko teknologiak dira, erabakiak hobeto hartzeko, errentagarritasun handiagoa eta arrisku txikiagoa izateko eta merkatuen krisiei eta eskariei aurrea hartzeko aukera eskaintzen duten teknologiak, hain zuzen ere.

Esperientzien trukaketa

Gainera, esperientzia batzuk trukatu dira honako hauei buruz: nekazaritzako elikagaian industria txikietan eta nekazaritzako ustiaketetan ezarritako sentsorika; ganaduaren geoposizionamendua eta hesi birtualak; 4.0 irtenbideak eraldatutako produktuak egiteko; intsumoen optimizazioa; nekazaritza eta basogintzako teledetekzioa eta monitorizazioa; haragi eta arrantza sektoreko eraldaketa kateko blockchain-a; eta ardogintza industriako Big Data aukerak.

Elikadura osasungarria eskaintzeko gai izango den etorkizun sektoriala lortzera bideratu da hori guztia, elikagaien segurtasuna eta animalien ongizatea modu jasangarrian bermatzeko; baliabideak eta energia modu eraginkorragoan erabili eta klima-aldaketa arintzeko; eta landaguneetako ekonomia indartzeko. Elikaduraren balio kate adimenduna, negozio-eredu berria sortuko duena, kate-begi guztien artean informazioa aprobetxatzeari esker produktuari balioa eman eta etengabeko berrikuntza lortu ahal izateko.

“Gure Ostalaritzan, Basque Wine”, Euskadiko edariak posizionatzeko konpromisoa

Txakolin-upategiak, Arabako Errioxako upategi txikiak, sagardotegiak eta garagardogile artisauak ostalaritzako salmenten mende daude erabat, eta, ondorioz, eragin handia izan dute azken hilabeteotan, Covid-19arekin lotutako murrizketen ondorioz, salmentetan % 40-60ko beherakada izan baitute. Egoera horri aurre egiteko, Gure Ostalaritzan Basque Wine programa abiarazi da. Xedea da programara atxikitako establezimenduetan Euskadiko edariak bultzatu, kokatu eta sustatzea.

Arantxa Tapiak, Ekonomiaren Garapen, Ingurumen eta Iraunkortasun sailburuak, ekimena aurkeztu du Donostiako Alde Zaharreko Trinitate plazan, Euskadiko elkarteekin eta Basque Wine sustapen-markaren babespeko edarien ekoizleekin batera. Tapiak azpimarratu du oso garrantzitsua dela Euskadiko ostalariak Gure Ostalaritzan Basqe Wine programara atxikitzea, eta, era berean, nabarmendu du Euskadiko edarien kalitate aitortua oso handia dela. Horrez gain, Euskadiko kontsumitzaileei dei egin die Basque Wine edariak ezagutu, aitortu eta exijitu ditzaten, ekoizpen-ekonomiari ekarpen handia egiten baitiote.

Ekitaldian, ostalaritza sektoreak eta Basque Wine produktuen ordezkariek hartu dute parte, baita Gipuzkoako Ostalaritza Elkarteko presidente Mikel Ubarrechenak, Eguren Ugarte upategiko Asun Egurenek eta Euskadiko ostalarien ordezkari Felix Partek ere.

Gure Ostalaritzan, Basque wine

Atxikipen-programa bat da, eta, horren bidez, nahi duten ostalaritza-establezimenduak proiektuaren parte izango dira eta bezeroei Euskadin ekoizten diren edarien gama osoa eskaintzeko konpromisoa hartzen dute. Euskadiko edariak lehentasunez posizionatzeaz gain, ostalariek konpromisoa hartu dute aretoko eta barrako langileek produktua aktiboki preskriba dezaten, baita hori gauzatzen dela kontrolatzeko konpromisoa ere.

Honako hauek dira ostalaritzaren konpromiso zehatzak:

  • Euskadiko edarien gamaren lau kategorien (Arabako Errioxa, Txakolina, Euskal Sagardoa, Basque Beer) eskaintza izatea.
  • Zerbitzu orokorrak eskatzen badira (ardo ondu bat, zuri bat, beltz bat, sagardo bat, txakolin bat…), beti eskaintzea Basque Wine markako edari bat.
  • Edarien karta izanez gero, Euskadiko edarien eskaintza lehenengo orrialdean edo lehentasunezko beste orrialde batean aurkeztea.
  • Jendaurreko euskarrietan Basque Wine eskaintza adieraztea.
  • Onartzea konpromisoak berekin dakarrela aurreko konpromisoak egoki betetzen direla kontrolatzen duten arduradunek (Mistery Shoppers) bisita egin ahal izatea.

Preskripzio-lan hori egin ahal izateko, Eusko Jaurlaritza-HAZIk saldu beharreko edariei buruzko prestakuntza pertsonalizatua eskainiko du aurretiaz adostutako salmenta-argudioak garatuz. Hori zehaztuko aretoko langileen edo zerbitzarien preskrikpzio aktiboan bai eta merkataritza-arloko beste gai batzutan ere. Prestakuntza horrek honako hauek artzen ditu barne: bideo-konferentzia bidezko prestakuntza-ikastaroen eskaintza garatzea; prestakuntza-pilulak sortzea, salmenta-uneaz eta preskripzio aktiboaz hitz egiteko eta kontsumitzaileak ardoa aukeratzean izaten duen portaerari buruzko datuak emateko; eta karta bat sortzeari, joera berriei, urtabe berriei, uztartzeei eta abarri buruzko zalantzak argitzeko "sommelierra zure eskura" zerbitzua eratzea. (astean 6 zerbitzu-ordu).

Gaur gaurkoz, 265 establezimendu atxiki dira ekimenera. Proiektuan parte hartu nahi duten taberna eta jatetxeek Bizkaiko, Gipuzkoako eta Arabako ostalaritza elkarteetara (AHB, AEHG, SEA Hostelería eta GasteizOn) edo HAZIra jo beharko dute.

Basque Wine

Basque Wine Eusko Jaurlaritzak eta edarien ekoizleek bultzatutako taldeko sustapen-marka bat da, eta xede du euskal upategietako produktuak posizionatzea, Basque Wine Office erakundearen koordinazio eta finantzaketapean.

Marka horrek tokiko, estatuko eta nazioarteko mailan bereizi eta aitortzen ditu Euskadiko edariak (Arabako Errioxako ardoa, Txakolina JDB , Euskal Sagardoa JDB eta artisau-garagardoak). Basque Winek bere osotasunean erakusten du Euskadiko edarien aniztasuna eta aberastasuna, eta areagotu egiten du edari horien ospea.

Chillida Leku Museoak apustua egin du Basque Wine sustapen markaren babespean dauden Euskadiko edariak sustatzearen alde

Chillida Leku gaur goizean HAZIk eta museoak Basque Wine sustapen marka zabaltzeko egin duten akordioaren aurkezpenaren lekuko izan da; horrela, aipatu markaren pean dauden edarien presentzia bermatuko da Eduardo Chillida euskaldun unibertsalaren eskulturak integratuta dauden lorategi eta basoetan egiten diren hainbat ekimenetan.

Modu horretan, besteak beste, Lurra Café-ren eskaintza gastronomikoan, Fede Pacha sukaldariaren eskutik eta Chillida Lekuren udako programazioan Basque Wine produktu sorta osoa egotea ziurtatzen da; Arabako Errioxako ardoak, txakolina, sagardoa eta garagardo artisaua.

Bestalde, museoak konpromisoa hartu du Euskadiko edariak Euskaditik kanpo antolatzen dituen nazioarteko ekitaldietan integratzen saiatzeko eta Basque Wine markaren presentzia sustatzeko bere instalazioetan egiten diren ekitaldi propio zein pribatuetan. Hitzarmen honen aurkezpenean parte hartu dute, besteak beste, Bittor Orozek −Eusko Jaurlaritzako Nekazaritza, Arrantza eta Elikagai Politikako sailburuordea−, Mireia Massaguék, Chillida Lekuko Zuzendari, Fede Pacha, Fede Pacha & Co. y Head Chef zuzendaria eta Euskadiko edarien sektoreko ordezkariek. Oroz sailburuordeak bere hitzaldian nabarmendu du oso garrantzitsua dela Chillida Lekuk produktuen kontsumorako, gomendiorako eta irudiaren zabalkunderako duen potentziala ahalik eta gehien erabiltzea, bai bere ostalaritzako eskaintzan Euskadiko lehen sektoreko produktuak erabiltzeko, bai esperientzia enogastronomikoak garatzeko, eta, hartara, Basque Wine markak babestutako edarien euskal sektorearen balioa erakusteko.

Era berean, Mireia Massagué Museoko zuzendariak azpimarratu duenez, "Eduardo Chillida beti izan da Euskadiren enbaxadore munduan; bere eskulturak mundu osoan zehar bidaiatu dute, eta Chillida lekuk lan horrekin jarraitu nahi du. Museoa Basque Wine markarekin lotzeak aukera ematen digu bertako ekoizleak laguntzeko gure mugetan eta mugetatik kanpo.

Bestalde, Fede Pachak azpimarratu du Lurra Caferen apustu honek bertako produktuaren alde Diametro 200ekin Oronan hasitako ibilbidea sendotzen duela eta elikadura osasungarria eta iraunkorra eskaintzeko proiektua da, bertako baserritarren, nekazarien eta abeltzainen lana babesten du, eta Hernani inguruan 200 kilometroko diametroko eremuan hazten eta umotzen diren produktuak erabiltzen ditu.

Basque Wine

Euskadiko edarien eta upategien sektorea sustatzeko marka berri bat da, eta honako hauek babesten ditu: Euskal Autonomia Erkidegoan botilaratutako eta Eskualdeko Ardo, Udalerriko Ardo edo Arabako Errioxako mahasti berezi gisa etiketatutako ardoak; “Basque Beer” artisau garagardoen marka kolektiboko garagardoa; “Arabako Txakolina”, “Bizkaiko Txakolina” eta “Getariako Txakolina” jatorri izendapeneko txakolinak; eta “Euskal Sagardoa” izendapeneko sagardoak. Ekintza hau lankidetza publiko-pribatuko estrategia baten barruan kokatzen da, Euskadiko edarien sektoreari laguntzeko, sustapen eta kontsumo kanalak indartzeko eta euskal upategien produktuak toki onean kokatzeko asmoz.

scribdicon

HAZI. Egoitza Nagusia. Granja modeloa z/g 01192 Arkauti, Araba. IFK. G48986137  l T 945 00 32 40 | hazi@hazi.eus | Pribatutasun Politika | Ohar Legala | Urrutiko Kontrola